Numbers 29

Pengkul Pawite

1“‘A kha sagihna a ni masa ni-in kikhopna siangtho khat bawl unla na nasep ngeina uh sem kei un. Tua ni, pengkulte mut ni ding ahi hi. 2TOPA a lungkimsak gimnamtui dingin meihal biakna-in a veka poina a nei lo bawngtalno khat, tuutal khat le kum khat a pha tuuno sagih pia un. 3A bawngtal tawh an-a biakna-in sathau helsa annel limci ephah a khat sehsawm suah sehthum; a tuutal tawh, sehsawm suah sehnih b; 4le a tuuno sagihte tawh sehsawm suah sehkhat c ciat bawl un. 5No ading thoihdamna bawl nadingin mawhna hanga biakna-in keel a pa khat tasak un. 6Hihte pen a kiciangtansa khasim le nisim-a meihal biakna, an-a biakna le dawntheih-a biaknate banah piak ding ahi hi. Tuate pen TOPA tungah mei-a hal biakna-a kipia - lungkimsakna gimnamtui ahi hi. ^a

Thoihdam Ni

7 “‘Hih a kha sagihna a ni sawm ni-in kikhopna siangtho khat bawl un. Pel loin no le no d kidek unla na sem kei un. 8TOPA tungah lungkimsakna gimnamtui dingin a veka poina a nei lo, bawngtalno khat tuutal khat le kum khat a pha tuuno apa sagih meihal biakna-in pia un. 9A bawng tawh, sathau helsa annel limci ephah khat sehsawm suah sehthum; a tuutal tawh sehsawm suah sehnih; 10le a tuuno sagihte tawh sehsawm suah sehkhat tek tawh an-a biakna pia un. 11Tuate banah thoihdamna dingin mawhna hanga biakna le a hunhun-a meihal biakna, an-a biakna, dawntheih-a biaknate le mawhna hanga biakna ding keel apa khat tasak un. ^b

Biakbuk Pawite

12 “‘A kha sagihna a ni sawm le nga ni-in kikhopna siangtho khat bawl unla, na nasep ngeite uh sem kei un. Ni sagih sung TOPA tungah pawi bawl un. 13TOPA lungkimsakna gimnamtui mei-a hal biakna, meihal biakna-in bawngtalno sawm le thum, tuutal nih le kum khat a pha tuuno apa sawm le li pia un, a veka poina nei lo hi ding hi. 14Bawngtal sawm le thumte tawh an-a biakna-in sathau helsa annel limci ephah khat sehsawm suah sehthum ciat, tuutal nihte tawh sehsawm suah sehnih ciat; 15le tuuno sawm le li tawh, sehsawm suah seh khat ciat pia un. 16A hunhuna meihal biakna-in an-a biakna le dawntheih-a biakna banah mawhna hanga biakna-in keel apa khat tasak un.

17 “‘A ninih ni-in a veka poina nei lo bawngtalno sawm le nih, tuutal nih le kum khat a pha tuuno apa sawm le li go un. 18Bawngtalte, tuutalte le tuunote, a kiciangtan a phazah tawh kizui-in an-a biakna le dawntheih-a biakna tawh pia un. 19A hunhuna meihal biakna le a an-a biakna le dawntheih-a biaknate banah mawhna hanga biakna-in keel apa khat tasak un.

20 “‘A nithum ni-in a veka poina nei lo, bawngtal sawm le khat, tuutal nih le kum khat a pha tuuno apa sawm le li go un. 21Bawngtalte, tuutalte le tuunote tawh a kiciangtan phazah tawh kizui-in an-a biaknate le dawntheih-a biaknate pia un. 22A hunhun a meihal biakna, an-a biakna le dawntheih-a biaknate banah mawhna hanga biakna-in keel apa khat tasak un.

23 “‘A nili ni-in a veka poina nei lo bawngtal sawm, tuutal nih le kum khat a pha tuuno apa sawm le li go un. 24A bawngtal, a tuutal le a tuunote tawh a kiciangtan phazah tawh kizui-in an-a biakna le dawntheih-a biaknate tawh pia un. 25A hunhun a meihal biakna, an-a biakna le dawhtheih-a biaknate banah mawhna hanga biakna-in keel apa khat tasak un.

26 “‘A ninga ni-in a veka poina nei lo, bawngtal kua, tuutal nih le kum khat a pha tuuno apa sawm le li go un. 27Bawngtalte, tuutalte le tuunote tawh a kiciangtan phazah tawh kizui-in an-a biaknate, dawntheih-a biaknate bawl un. 28A hunhuna meihal biakna, an-a biakna le dawntheih-a biaknate banah mawhna hanga biakna-in keel apa khat tasak un.

29 “‘A niguk ni-in a veka poina nei lo bawngtal giat, tuutal nih le kum khat a pha tuuno apa sawm le li go un. 30Bawngtalte, tuutalte le tuunote tawh a kiciangtan phazah tawh kizui-in, an-a biaknate, dawntheih-a biaknate pia un. 31A hunhun a meihal biakna, an-a biakna le dawntheih-a biaknate banah mawhna hanga biakna-in keel apa khat tasak un.

32 “‘A ni sagih ni-in, a veka poina nei lo, bawngtal sagih, tuutal nih le kum khat a pha tuuno a pa sawm le li go un. 33Bawngtalte, tuutalte le tuunote tawh a kiciangtan phazah tawh kizui-in, an-a biakna le, dawntheih-a biakna-te pia un. 34A hunhun a meihal biakna tawh an-a biakna le dawntheih-a biaknate banah mawhna hanga biakna-in keel apa khat tasak un.

35 “‘A nigiat ni-in kikhopna khat bawl unla na nasep ngei uh sem kei un. 36TOPA a lungkimsak mei-a hal biakna-in a vekpi-in poina nei lo bawngtal khat, tuutal khat, kum khat a pha tuuno apa sagih meihal biakna-in pia un. 37Bawngtal, tuutal le tuunote tawh, a kiciangtan phazah tawh kizui-in an-a na biaknate uh le dawntheih-a na biakna uh pia un. 38A hunhun-a meihal biakna, an-a biakna le dawhtheih-a biaknate banah mawhna hanga biakna-in keel apa khat tasak un.

39 “‘Na kiciamnasate uh le utthu-a biaknate banah meihal biaknate, an-a biaknate, dawntheih-a biaknate le kilawmtakna biaknate - a kisehsa pawite hunin TOPA adingin bawl un,’ ci in,” a a ci hi.

40 TOPA in a thupiaksa khempeuh Moses in Israel-te tungah a gen hi.